En ayna ɓikkon men booɗɗum en laatina ɓe ɓe mara

Transcription

En ayna ɓikkon men booɗɗum
en laatina ɓe ɓe mara semmbe !
Yimɓe « Communication pour le développement » ngaɗi deftel ngeel — marcodev@orange.fr
1
En ayna ɓikkon men booɗɗum
en laatina ɓe ɓe mara semmbe !
Ndaa waazuuji jey aynugo nyaamdu ɓikkon
bee aynugo njamu maɓɓe booɗɗum
2
Noy daada hokkata beebe maako musina ?
3
Noy daada hokkata beebe maako musina ?
Emugo : Ɗume on laarata haa dow foto ɗoo ?
Jaabugo : Min ɗon laara daada ɗon hokka ɓinngel maako musina.
Emugo : Noy goɗɗo waɗata haa beebe heɓa musina booɗɗum ?
Jaabugo : Sey en waata hakkiilo dow kuuje jowi :
 1. Sey beebe maɓɓita hunnduko ɓooɗɗum.
 2. Sey hunnduko beebe man jey gal les ɗoo, wurta gal yaasi.
 3. Sey wakkude beebe man meema enndu.
 4. Sey gole beebe man uppa.
 5. Sey o mukka nder hunnduko maako ɓurna hunnduko enndu jey ɓaleejum ɗoo pat.
Waazuuji
‣ On acca beebe mon timmina musingo enndu gootel tawon e boo on reena o wurtina bee hoore maako enndu jey
nder hunnduko ɗoo, sey ɓaawo man kadi, on fuɗɗa hokkugo mo enndu jey feere.
Bannii ɗoo, on anndi o musini ɓurna kosam jey woni nder enndu man.
‣ Sey on tokka hokkugo beebe mon kosam bana no o yiɗi, haa o safta, jemma bee naange fuu. Nyalde fuu baakin
nde sappo e ɗiɗi on hokkata beebe mon kosam.
4
Booɗɗum kam beebe musina kosam daada.
5
Booɗɗum kam beebe musina kosam daada.
Jaabugo : Min ɗon laara beebe jey musini kosam daada tan, bee beebe jey yari ndiyam wakkati lebbi jeego ɓe danyi
mo.
Emugo : Ɗume on laarata feere feere haa caka beebe’en man ? Ɗume waɗi beebe’en man feere feere ?
Jaabugo : Beebe jey gal junngo agula ɗoo, o musini kosam daada maako tan, haa o waɗi lebbi jeego. O ɗon maati
njamu, ngam kosam daada ɗon mari nyaamdu kompule (jey timmidi) jey beebe’en. Kosam daada ɗon
hokka beebe kala ko o mari haaje fuu haa cika lebbi jeego : o maraay haaje nyaamugo hunnde feere, o
maraay haaje yarugo hunnde feere. Beebe jey gal junngo nyaamo ɗoo, o yari ndiyam malla gaari wakkati
lebbi jeego ɓe danyi mo, njamu maako saataay ; reedu maako ɗon heewi bee ndiyam, o maraay haaje
musingo kosam daada. Beebe jey yarata ndiyam bee gaari marataa nyaamdu kompule (jey timmidi), o
nyawan. O tammi saarugo e boo o nyawan ndammba jey doktor’en ewnata pinemoni.
Emugo : Ngam ɗume booɗɗum beebe musina kosam daada ?
Jaabugo : Kosam daada fakan nyawuuji yaataa haa beebe. E boo, to on ɗon hokka beebe kosam mon tan, on hisan
heɓugo reedu wakkati man.
Waazuuji
‣ To beebe mon waɗi lebbi jeego, on fuɗɗa hokkugo mo gaari jey modduɗum. On ɓesda nder gaari man ɓikkon
leɗɗe, nebbam malla leeɓol, heŋre, geeraaɗe, kosam jey kuroori ɗoo, biriiji dirɓaaɗi, koosay malla boo haako jey
ɓe nami.
‣ To beebe mon waɗi lebbi jeego, on tokka hokkugo mo o musina, baakin koo nde jeetati haa nyalde fuu, jemma
bee naange, ɗoo ngam haa joga njamu maako e boo ngam haɗa kosam mon darugo.
6
Haa cika lebbi jeego kam fuu, beebe ɗon mari haaje kosam daada tan.
7
Haa cika lebbi jeego kam fuu, beebe ɗon mari haaje kosam daada tan.
Jaabugo : Daada ɗon jooɗi booɗɗum hokka beebe maako kosam. Goɗɗo yiɗi hokkugo mo ndiyam o hokka beebe
maako, ammaa daada man sali.
Emugo : Ngam ɗume daada yiɗaa hokkugo beebe maako jey cikaay lebbi jeego ndiyam o yara ?
Jaabugo : O ɗon sala, ngam kosam maako tan o hokkata beebe maako musina. Bana wiigo sey kosam enɗi maako
tan o hokkata mo, walaa hunnde feere, koo ndiyam seeɗa, koo gaari malla dollere o hokkataa mo. O foti o
hokka mo seeɗa ndiyam jey dolli, to o ɗon yarna mo lekki, ɗoo boo to o nyawɗo e boo doktor wii ɓe
waɗa bannii.
Emugo : Ngam ɗume booɗɗum beebe musina kosam daada maako tan ?
Jaabugo : Booɗɗum hokkugo beebe musina kosam daada maako tan, haa o cika lebbi jeego, ngam ɗum haɗan
nyawu nanngugo mo. Kosam daada, ɗum nyaamdu kompule (jey timmidi) jey beebe. Kosam man woodi
kala ko beebe marata haaje fuu ngam haa o mawna booɗɗum. Kosam daada woodi ndiyam jey beebe mari
haaje fuu. Beebe maraay haaje yarugo hunnde feere, illaa kosam daada maako, koo wakkati to gulɗum
ɗon waɗa.
Waazuuji
‣ Kosam daada he’i ittugo ɗomka beebe.
‣ Ɗum kosam daada wonete nyaamdu jey booɗɗum ngam njamu beebe. Ndiyam, gaari malla kuuje feere yarugo
ɗoo, foti hokka beebe nyawuuji e hokka mo caarol.
8
To beebe nyawɗo, sey o musina ɓura jey o musinta foroy.
9
To beebe nyawɗo, sey o musina ɓura jey o musinta foroy.
Jaabugo : Min ɗon laara beebe nyawɗo, o yiɗaa musingo, ammaa daada maako ɗon haɓda hokkugo mo kosam man,
e boo, ragare man, o safti o musini.
Waazuuji
‣ To beebe mon nyawɗo, sey o musina ɓura jey o musinta foroy.
‣ Kosam daada woodi kala ko beebe mari haaje fuu.
‣ To on hokki beebe mon ndiyam, kosam mon ustan e teema boo beebe foti saara.
‣ To beebe ɗon musina booɗɗum, ɓanndu maako yoorataa ; to ndiyam timmi haa ɓanndu beebe nyawɗo, ɗum
kalluɗum jamum.
‣ To beebe nyawɗo, o jaɓataa musingo. Koo to caɗɗum boo, sey tokka hokkugo mo kosam non ɓura wakkati jey o
ɗon bee njamu ma, bana jey ɓe ɗon tinndina yeeso ɗoo :
‒ On jooɗa bee beebe mon nyawɗo kala leer fuu, malla leer ɗiɗi fuu, ngam on hokka mo kosam.
‒ Koo to o jaɓataa, on haɓda no wa’i fuu o heɓa o musina.
‒ To dabare mon fuu timmi, o sali musingo, yaaree mo law-law lopital.
10
Noy goɗɗo nyaamnata beebe ɓaawo lebbi jeego ?
11
Noy goɗɗo nyaamnata beebe ɓaawo lebbi jeego ?
Jaabugo : Min ɗon laara daada ɗon hokka beebe maako nyaamdu, nde ɓaawo lebbi jeego sey kosam tan o hokki
mo.
Emugo : Nyaamdu jey toy ɓe hokkata beebe ɓaawo lebbi jeego ?
Jaabugo : Ɓaawo lebbi jeego, sey ɓesda nyaamdu feere dow kosam daada. Sey beebe’en fuɗɗa nyaamugo seeɗa
seeɗa kuuje feere. Ammaa, to beebe ɗon mari hakkunde lebbi jeego bee lebbi sappo e ɗiɗi, booɗɗum
hokkugo mo o musina tawon, foddee ɓesda nyaamdu feere. On tokka fahin hokkugo mo o musina peetum
man nde jeetati haa nyalde fuu, jemma bee naange, ɗoo ngam haa o heɓa nyaamdu maako kompule (jey
timmidi) e boo on heɓa on daaynindira hoocugo reedu.
Emugo : Nyaamdu jey toy ɓe foti ɓe hokka beebe jey mari lebbi jeego malla jeeɗiɗi ?
Jaabugo : Ɓe foti ɓe hokka mo gaari bee nyaamdu jey ɓe nami.
Emugo: Nde noy nder nyalde ɓe hokkata beebe nyaamdu ?
Jaabugo : Sey hokka mo nyaamdu nde ɗiɗi nyalde fuu.
Emugo: Deydey noy foondata nyaamdu beebe man ?
Jaabugo : Hokka mo nyaamdu man baakin kuyer peetel peetel ɗoo ɗiɗi malla tati wakkati nyaamugo maako fuu.
12
Noy goɗɗo nyaamnata beebe jey mari lebbi jeego haa yaago lebbi jeetati ?
13
Noy goɗɗo nyaamnata beebe jey mari lebbi jeego
haa yaago lebbi jeetati ?
Jaabugo : Min ɗon laara daada ɗon hokka beebe maako nyaamdu.
Emugo : Nyaamdu jey toy daada hokkata beebe maako ?
Jaabugo : O ɗon hokka mo gaari, o ɓesdi nder gaari man nebbam malla leeɓol, geeraaɗe, biriiji dirɓaaɗi, tunkusa
jey ɓe uni, kosam penndiiɗam malla kosam jey kuroori ɗoo, kodde noome malla kurnaaje joorɗum jey ɓe
uni, nyebbe jey ɓe nami, dukuuje, monngoro malla heŋre jey ɓe nami. Kuuje ɗoo pat, sey ɓe nama
booɗɗum foddee ɓe loowa nder gaari.
Emugo : Nde noy nyalde fuu ɓe hokkata nyaamdu haa beebe jey mari lebbi jeego haa yaago lebbi jeetati ?
Jaabugo : Sey ɓe hokka mo nyalde fuu nyaamdu nde tati malla nde nay.
Emugo : Deydey noy hokkugo mo man foti ?
Jaabugo : Hokka mo peetum man bana deydey bool gaari ɗoo (jey fotata 15 cl) haa kala wakkati nyaamdu maako
fuu. [Montrer un bol qui peut avoir cette contenance].
14
Noy goɗɗo nyaamnata beebe jey mari lebbi jeenaay
haa yaago lebbi sappo e ɗiɗi
15
Noy goɗɗo nyaamnata beebe jey mari lebbi jeenaay
haa yaago lebbi sappo e ɗiɗi
Jaabugo : Min ɗon laara debbo ɗon hokka beebe maako nyaamdu.
Emugo : Ɗume o hokkata beebe maako nyaama ?
Jaabugo : O ɗon hokka mo gaari jey ɗon moddi, o ɓesdi nder gaari man nyaamdu jey ɓe nami : bana heŋre, kusel,
liɗɗi malla kusel gertogal, geeraaɗe, nyebbe, kosam bee nebbam malla leeɓol.
O ɗon hokka mo boo nyaamdu jey o waawata jogugo nder junngo maako (ɓikkon leɗɗe, haakooji...).
Emugo : Nde noy o hokkata mo nyaamdu haa nyalde fuu ?
Jaabugo : Sey o hokka mo nyalde fuu nyaamdu nde tati (fajira, midi bee manngariba), o ɓesdana mo kuuje seeɗa
gal asira.
Emugo : Deydey noy hokkugo mo man foti ?
Jaabugo : Sey o hokka mo peetum man deydey bool gaari (jey fotata 20 cl) wakkati nde o nyaamata fuu.
Waazu
‣ Beebe ɗon mari nyaamdu maako jey ɓe defi ngam maako tan, ammaa daada maako foti hokka mo nyaamdu seeɗa
jey ɓe defi ngam yimɓe saare fuu.
16
Noy goɗɗo nyaamnata beebe jey mari lebbi sappo e ɗiɗi
haa yaago lebbi noogas e nay
17
Noy goɗɗo nyaamnata beebe jey mari lebbi sappo e ɗiɗi
haa yaago lebbi noogas e nay
Jaabugo : Min ɗon laara baaba bee daada ɗon ekkitina ɓinngel maɓɓe nyaamugo.
Emugo : Ɗume ɓe hokkata mo o nyaama ?
Jaabugo : Ɓe ɗon hokka mo nyaamdu jey ɓe nyaamata kamɓe man, ammaa sey ɓe nama nyaamdu man tawon, to o
waawataa nyaamgo nyaamdu man bana nii.
Emugo : Nde noy ɓe hokkata mo nyaamdu nyalde fuu ?
Jaabugo : Ɓe hokka mo nyalde fuu nyaamdu nde tati (fajira, midi bee manngariba), ɓe ɓesda kuuje seeɗa gal
njamndi sappo fajira bee gal njamndi nay asira.
Emugo : Deydey noy jey ɓe hokkata mo man foti ?
Jaabugo : Ɓe hokka mo peetum man deydey bool gaari (jey fotata 25 cl) wakkati nde o nyaamata fuu.
Waazu
‣ Ɓinngel ɗon nyaama nyaamdu bana jey yimɓe feere nyaamata haa nder saare, ammaa, nde o ɗon mawna jamum,
o ɗon mari fahin haaje musingo daada maako, peetum man nde jeego malla nde jeetati haa nyalde fuu. O ɗon
mari haaje nyaamugo fahin boo ; ɓikkon leɗɗe bee haakooji feere feere, kusel, kusel gertogal, geeraaɗe, biriiji,
liɗɗi jey yoori, nebbam bee leeɓol.
18
Goɗɗo sey fija bee ɓinngel maako, ngam haa findina hakkiilo maako.
19
Goɗɗo sey fija bee ɓinngel maako, ngam haa findina hakkiilo maako.
Emugo : Ɗume on laarata haa dow foto ɗoo ? Ngam ɗume daada bee baaba ɗon fija bee ɓikkon maɓɓe ?
Jaabugo : Ɓinngel ɗon mari haaje nyaamugo ɓooɗɗum e boo o ɗon mari haaje ɓe suklina mo, ɓe hokka mo yiide.
To daada bee baaba ɗon holla ɓikkon maɓɓe ɓe yiɗi ɓe, e boo ɓe ɗon waatina ɓe hakkiilo, ɗum ɗon walla
ɓinngel mawnugo booɗɗum. Ɓinngel ɗon mari haaje o faama daada bee baaba maako yiɗi mo waane e ɓe
ɗon waatani mo hakkiilo : bannii ɗoo, hakkiilo maako ɗon maɓɓita, o ekkitan wolwugo law e boo o seyan
nder saare.
Waazuuji
Haa heɓa ɓinngel mawna booɗɗum, heɓa hakkiilo maako maɓɓita e boo o hoola yimɓe jey woni haa sera maako,
‣ sey en wolwana mo daga to ɓe danyi mo nii ;
‣ sey en holla mo en ɗon waatani mo hakkiilo : en laara mo, en yimana mo gimi seeɗa seeɗa, en fija bee maako,
waato en yemmbita wolde maako, heɓa o dimmba, o jalana en, o laara en... ;
‣ sey en holla mo en yiɗi mo.
20
To ɓinngel nyawɗo, sey nyaama, musina ɓura foroy.
21
To ɓinngel nyawɗo, sey nyaama, musina ɓura foroy
Jaabugo : Min ɗon laara daada ɗon hokka ɓinngel maako nyawɗo, nyaamdu bee ndiyam.
Emugo : Nyaamdu jey toy o hokkata ɓinngel maako nyawɗo ?
Jaabugo : O ɗon defana mo nyaamdu jey mari vitamin A jur, bana waygoore, karoot, haakooji, masarji, nyebbe,
banaan, dukuuje, ananas, oras, monngoro, pastek, liɗɗi, kusel, kosam, kusel gertogal, nebbam biriiji.
Emugo : Ngam ɗume sey ɓe tokka hokkugo ɓinngel musina, nyaama e boo o yara to o nyawɗo ?
Jaabugo : Sey on tokka hokkugo ɓinngel nyawɗo musina e boo on hokka mo nyaamdu bee ndiyam ɓura foroy,
ngam haa o heɓa o yamɗita law e boo ngam haa o heɓa nyaamdu kompule (jey timmidi).
Waazu : Ɓinngel mon jaɓataa musingo malla nyaamugo to o nyawɗo. Ammaa, sey on tokka hokkugo mo o musina,
on hokka mo o nyaama e boo on hokka mo o yara ɓura foroy wakkati o nyawɗo. Ndaa no on waɗata :
‣ Haa kala leer fuu malla haa leer ɗiɗi fuu, on joga ɓinngel mon nyawɗo haa dow kosɗe mon, on hokka mo o
musina, o nyaama, o yara.
‣ Koo to o sali, on waɗa anndal e dabare mon, heɓa o musina, o nyaama e boo o yara.
‣ Sey on mara haa saare kuuje jey o ɓuri yiɗugo, bee ndiyam jey laaɓi haa nder kopru bee maɓɓoode.
Nden to ɓinngel man sali musingo, nyaamugo bee yargo, doggee law-law, on yaara mo lopital.
22
Noy goɗɗo waɗata haa hurga caarol ?
23
Noy goɗɗo waɗata haa hurga caarol ?
Jaabugo : Min ɗon laara ɓinngel ɗon saara. Daada maako ɗon hokka mo ndiyam jey jilli mannda bee sukar.
Emol : Ɗume kadi goɗɗo foti hokka ɓinngel jey ɗon saara ?
Jaabugo : To o ɗon saara, on jilla ndiyam bee sukar bee mannda ; malla boo, on jilla nder ndiyam leedayel lekki
esero [SRO] gootel.
Emugo : Ngam ɗume sey yarna ɓinngel ndiyam jey jilli mannda bee sukar ɗoo to o ɗon saara ?
Jaabugo : To ɓinngel ɗon saara, ndiyam ɗon timma nder ɓanndu maako, laral maako ɗon ɗooma ; ngam ndiyam bee
mannda usti nder ɓanndu maako.
Emugo : Noy ɓe jillata ndiyam bee mannda bee sukar ?
Jaabugo : To on ɗon mari lekki caarol (lekki esero), on waata mannda man nder liitir ndiyam, on jilla booɗɗum. To
naa non, on waata nder liitir ndiyam, mannda deydey kuyer gootel, bee sukar ɓoɗe-ɓoɗe ɗoo jeetati, malla
boo bee kuyer sappo e jowi sukar nokki-nokki ɗoo, on jilla booɗɗum. (On hakkiila, faandu jey “Tangui”
kam, liitir bee reeta waɗata.) On yarna ɓinngel mon ndiyam man bee kuyer peetel. On yarna mo nde jur
haa nyalde fuu. Janngo boo, on yarna mo bannii fahin.
Waazu : ‣ To caarol man daraay haa balɗe tati, ɗoo kam, on yara ɓinngel man lopital.
HAALA JEY GOƊƊO WAAZATA
‒ Booɗɗum kam, holla daada’en man noy jillugo ndiyam bee mannda bee sukar ɗoo, e boo ema ɓe ɓe jilla haa
yeeso mon.
‒ Ɓe ɗon wi’a ɓinngel to ɗon saara, taa yara ndiyam jur, taa nyaama jur bana foroy. On wolwa haala man bee
daada’en. On wi’a ɓe ɓaawo man, to ɓinngel ɗon saara sey yara, nyaama booɗɗum, ngam haa o yamɗita law.
‒ On tinndina daada’en, noy ɓe faamata to ndiyam usti nder ɓanndu ɓinngel ; on tinndina ɓe boo batte feere, jey
emata sey ɓe yaara ɓinngel lopital (masalan ii’am nder caarol).
24
Nyaamdu jey toy booɗɗum haa ɓikkon ?
25
Nyaamdu jey toy booɗɗum haa ɓikkon ?
Emugo : Ɗume on laarata dow fotooji ɗoo ?
Jaabugo : Min ɗon laara ɓikkon tati, ɓe ɗon mari kuuje nyaamugo bee yarugo haa sera maɓɓe.
Emugo : Ɗume laati feere feere haa ɓikkon tati man ?
Jaabugo : Ɓinngel jey gal junngo agula ɗoo, ɗon foo’i jamum ; ɓinngel jey haa caka ɗoo, ɗon mari semmbe, o ɗon
maati njamu, ɓinngel jey gal junngo nyaamo ɗoo boo, ɓanndu maako ɗon uppi-uppi.
Emugo : Ɓinngel jey gal junngo nyaamo bee ɓinngel jey gal junngo agula, ɗume ɓe mari jey nyaamugo ?
Jaabugo : Ɓikkon man ɗon mari gawri malla masarji tan jey nyaamugo maɓɓe.
Emugo : Ɓinngel jey haa caka ɗoo, ɗume o mari jey nyaamugo maako ?
Jaabugo : Ɓinngel jey haa caka ɗon mari kuuje nyaamugo feere feere jur : accu gawri bee masarji, o ɗon mari
haakooji, waygoore, karoot, biriiji, ɓikkon leɗɗe, kosam, liɗɗi, kusel, kusel gertogal, geeraaɗe, nebbam.
Waazu
‣ Haa ɓinngel mon heɓa mara njamu, sey on hokka mo nyaamdu feere feere tum. Dow nyiiri ɗoo, on hokka mo
fahinta ɓikkon leɗɗe, haakooji, karoot, nyebbe, biriiji, kusel, liɗɗi malla gertogal, kosam malla yawuur, nebbam
malla leeɓol.
26
Noy goɗɗo waɗata haa faama ɓinngel walaa vitamin A ?
27
Noy goɗɗo waɗata haa faama ɓinngel walaa vitamin A ?
Emugo : Ɗume on laarata dow foto ɗoo ?
Jaabugo : Jemma ɓadi waɗugo. Ɓinngel ɗon naasta saare, o lukki koromwal haa sera dammugal. O lukki fahinta
taasaawo, ndiyam rufi. O foondi hoocugo lalam dow taabal, ammaa o do’’i lalam man.
Emugo : Ngam ɗume ɓinngel laaraay koromwal bee kuuje feere ɗoo ? Ɗoo kam ngam ɗum waɗi nyiɓre nder saare
na ?
Jaabugo : Kaay! Naa ngam man. Nder saare ɗon laaɓi seeɗa, ngam lalam ɗon huɓɓi.
Emugo : Ngam ɗume kadi, koo ngam bee yiite lalam, ɓinngel laaraay koromwal bee kuuje feere ?
Ko daada’en jaabata : Ɗoo kam, min anndaa ko tawi mo !
Ko waazoowo jaabata : Ngam ɓinngel man walaa vitamin A. Ngam maajum o laarataa booɗɗum to yiite laaɓaay jur.
Waazu
‣ To ɓinngel mon laarataa booɗɗum to jemma ɗon waɗa malla to fajira ɗon weeta, yaaree mo lopital. Doktor
hokkan mo vitamin A. To o hooci vitamin A, ɓinngel laaran booɗɗum koo to yiite laaɓaay jur.
28
Sey ɓinngel mara vitamin A deydey nder ɓanndu.
29
Sey ɓinngel mara vitamin A deydey nder ɓanndu.
Jaabugo : Min ɗon laara ɓe ɗon toɓɓa lekki haa hunnduko ɓikkon. Goonga kam, ɗum ɓinngel gootel non, ammaa
wakkati duuɓi maako feere feere.
Emugo : Lekki jey toy ɓe ɗon hokka mo ?
Jaabugo : Ɓe ɗon hokka mo lekki vitamin A.
Emugo : Kala ɓinngel fuu ɗon mari duuɓi noy haa dow foto ɗoo ?
Jaabugo : Lebbi jeego, lebbi sappo e ɗiɗi, nduuɓu bee lebbi jeego, duuɓi ɗiɗi, duuɓi ɗiɗi bee lebbi jeego, duuɓi tati,
duuɓi tati bee lebbi jeego, duuɓi nay, duuɓi nay bee lebbi jeego, duuɓi jowi.
Emugo : Ngam ɗume hakkunde lebbi jeego haa yaago duuɓi jowi, sey ɓinngel hooca vitamin A ?
Jaabugo : Ɓikkon sey nyaama kuuje jey mari vitamin A jur : monngoro, banaan, karoot, haakooji, heŋre, kosam bee
yawuur, geeraaɗe, ɓikkon leɗɗe, bana ko nanndi e maajum. Lekki vitamin A ɗon ɓesdita nyaamdu ɓinngel
e boo ɗon sappina bee goonga ɓikkon man ɗon mari vitamin A deydey nder ɓanndu.
Waazuji
‣ Daada, to ɓinngel maa waɗi lebbi jeego, a tokka hokkugo mo o musina e boo a hokka mo nyaamdu jey yaadata
bee duuɓi maako, bana ɓikkon leɗɗe, haakooji, kosam bee yawuur, kusel, liɗɗi, kusel gertogal bee geeraaɗe.
‣ To ɓinngel maa waɗi lebbi jeego ni, yaaru mo lopital ɓe hokka mo vitamin A. A lora to waɗi lebbi jeego fuu haa
o cika duuɓi jowi. Daga lebbi jeego haa yaago duuɓi jowi, ɓinngel maa sey hooca vitamin A sappo, bana wiigo
kala lebbi jeego fuu, o hooca gootel. Bana nii ɗoo, on faddanan mo nyawuuji jur, e boo o heɓan gite maako laara
booɗɗum koo to nyiɓre waɗi..
30
Daada sey lalla juuɗe maako bee saabul ngam haa o hisa heɓugo
nyawuuji e haa o hisa raaɓugo ɓinngel maako nyawuuji man.
31
Daada sey lalla juuɗe maako bee saabul ngam haa o hisa heɓugo
nyawuuji e haa o hisa raaɓugo ɓinngel maako nyawuuji man.
Jaabugo : Min ɗon laara debbo wurti ɓaawo-suudu e o ɗon lalla juuɗe maako bee ndiyam bee saabul.
O lalla juuɗe maako bee ndiyam bee saabul ɓaawo to o yiiwi ɓinngel maako.
O lalla juuɗe maako bee ndiyam bee saabul hiddee ko o defa e hiddee ko o hokka ɓinngel maako nyaama.
Emugo : Wakkati ndey daada foti lalla juuɗe maako ?
Jaabugo : Sey daada lalla juuɗe maako hiddee ko o defa e hiddee ko o nyaama.
Sey o lalla juuɗe maako ɓaawo to o yehi ɓaawo-suudu malla boo ɓaawo to o walliti ɓinngel maako silli
malla bu’i.
Sey o lalla juuɗe maako ɓaawo to o fiɗɗi suudu, malla to o wuuwi caka saare.
Sey o lalla juuɗe maako hiddee ko o hokka beebe maako musina, malla o hokka mo o nyaama.
Emugo : Wakkati ndey on foti on lalla juuɗe ɓikkon mon ?
Jaabugo : Sey goɗɗo lalla juuɗe ɓikkon hiddee ko ɓe nyaama.
Sey goɗɗo lalla juuɗe ɓikkon ɓaawo to ɓe silli malla to ɓe bu’i.
Sey goɗɗo lalla juuɗe ɓikkon ɓaawo to ɓe fiji.
32
Sey goɗɗo hurga ɓikkon jey ɗon mari gilɗi.
33
Sey goɗɗo hurga ɓikkon jey ɗon mari gilɗi.
Jaabugo : Min ɗon laara ɓinngel ɗon saara. Gilɗi ɗon nder bu’e maako.
Woodi ɓinngel feere boo, laral ɓanndu maako fuu paare paare.
Kuuje ɗoo ɗon holla ɓikkon man ɗiɗi fuu ɗon mari gilɗi nder reedu.
Sey ɓinngel moɗa lekki gilɗi gootel (Mebendazole) haa kala lebbi jeego fuu haa o hisa gilɗi.
Emugo : Ngam ɗume sey goɗɗo hokka ɓikkon lekki gilɗi ?
Jaabugo : Ɓinngel jey walaa gilɗi ɗon maata njamu. O nyaaman jur e o mawnan booɗɗum.
Waazu
‣ Sey goɗɗo hokka ɓikkon lekki gilɗi daga to ɓe ciki duuɓi gootel nii ; ɗum koyɗum jamum, ceede man boo
naawaay e ɗum dabare jey booɗɗum haa aynugo njamu ɓikkon.
Gilɗi reedu ɗon wujja nyaamdu jey ɓikkon nyaami, suy ɓikkon man warta walaa semmbe.
34
Ndaa ɓinngel jey ɗon maata njamu !
35
Ndaa ɓinngel jey ɗon maata njamu !
Jaabugo : Min ɗon laara ɓinngel jey ɗon maata njamu : o ɗon jala o ɗon mari semmbe.
O musini kosam daada maako tan haa o ciki lebbi jeego, o nyaamaay nyaamdu feere sam.
Daada maako ɗon hokka mo o musina kala nde o tefi musingo fuu, e o ɗon hokka mo fahinta boo
nyaamdu feere feere, jey haa o safta. O ɗon hokka mo o nyaama heŋre, kusel, kusel gertogal, liɗɗi,
nyebbe, biriiji, geeraaɗe, kosam, waygoore, karoot, haakooji, banaan bee monngoro. O ɗon hokka mo
nder kala lebbi jeego fuu lekki gilɗi.
Waazuuji
‣ To haa ɓikkon mon mawna booɗɗum, hokkee ɓe ɓe nyaama haa ɓe safta. Sey nyaamdu ɓikkon boo laata feere
feere. Nden kam, sey ɓikkon nyaama heŋre, kusel, kusel gertogal, liɗɗi, nyebbe, biriiji, geeraaɗe, kosam,
waygoore, karoot, haakooji, banaan, monngoro e ko nanndi bannii. Sey o tokka hokkugo ɓe ɓe musina peetum
man nde jeetati haa nyalde fuu, jemma bee naange haa ɓe heɓa ɓe mawna booɗɗum e taa on hooca reedu kesum
bee law.
‣ Yaaree ɓikkon mon lopital haa to ɓe ciki duuɓi tati ngam haa dokta heɓa foonda darnde maɓɓe bee hooca kilo
maɓɓe.
36

En ayna ɓikkon men booɗɗum en laatina ɓe ɓe mara

Transcription

Similar documents

Dictionnaire peul de l`agriculture et de la nature - Llacan