ibdula agiginne

Transcription

ibdula agiginne

Gunayala, 2008
Aiban Wagua | IBDULA AGIGINNE
P . 861
W 133
Wagua, Aiban
Ibdula agiginne / Aiban Wagua – Panamá: [s.n],
2008. 42 p.; 21 cm
ISBN 978-9962-00-475-2
1. POESÍA INDÍGENA
2. LITERATURA INDÍGENA PANAMEÑA
3. LITERATURA INDÍGENA I. Título.
1
NAN GARBURBA ODULOGED IGAR
Proyecto de Implementación de Educación Bilingüe
Intercultural en los Territorios gunas de Panamá
IBDULA AGIGINNE
Aiban Wagua
Ologwagdi
e burbagan sobsa
GUNAYALA, 2008
2
Eba mimmigan namaggega, gi sunmaggega,
ba gormagbaliga, we ibmar narmaglesa;
neggwebur baigangi
dulemar neg nuedese warmaggedigar balaminanaid, gin
ganguergarmo.
Aiban Wagua
3
YABANAID
Iduar
Ibdula agiginne
Bulagwa
Nana burgala agnuenai
¡Baba, anga be nudsu sobe!
An nanga
¡Nelegan, nana burba seloedage!
Waggudar
Nanaye se gollege
Noga gobe
¿An ai, gole aminama?
¡Ibdulagan urwedibi!
Babagan gwissigusa
Sior namagge
Addagge, nue be addagge
¡Dule bursunde!
Yooedise
Nana yala
We an yala
¡An ai!
Danibalo
Nade, bad nade
We igala, dadgan igala
Be soge
Dada naggwiali
Dada Massidola
Melle be soge…
Ibdulagan
Abiayala
5
6
7
9
10
11
12
13
14
15
16
17
18
19
20
21
22
23
24
25
26
27
29
30
31
32
33
34
36
4
IDUAR
Mimmigan ba nabir gormaggega, we sabgasoggwen
narmaglesa. Bibbigwagi ibmar durdagleged, diggasuli
ebinsalege. Doddogan anba burwigwagine yarbina
gwisgued e igargan odurdagleged nue ebelege,
yooedse nabir anmar Yala eba bendaglegega. We
gormaggedigar aagi binsar narmaglesa, aagi gabdaglesa narmagleargu.
Nan Garburba Oduloged Igargi, bela anmar bulagwa
arbader, Yarga ibmar nuedi anmar amioe, Gunayala
gi burba gannaledoe: geb mimmigan, anmar sorba
daniggid, igar nuegangi nergumagudoe. Emisgwa,
anmar ga sabbursergangi arbanagussunna, aaga dule
wargwen beed abelesuli. Bela we ibmar bulagwa na
agdomaladi, gwenaddigwale, duiggwagwa, anmar
Onmaggeddummagangi ise aggaale...
Nue iddomalo, igi mimmigan anmarga namagdamalodibe; igi anmar uaya oburudmalodibe.
Aiban Wagua
5
IBDULA AGIGINNE
Diulag ibdula agiginne,
ise boaleboale,
ise gwilale, gwilale;
sabbursig ibdula agiginne,
ise babaddale, babaddale.
Niba, ibdula agiginne,
bela gudure wialewiale,
nunumagge ibdula agiginne.
Deaggasig ibdula agiginne,
muubillisig,
dad argwanesig,
nega uluba,
Nunumagge, nunumagge agiginne.
Nana Durwanasob,
gwala gasa gwissigusa.
¡Anba dule alleddibi,
dodoedibi,
mummuddibi…!:
“Nega gwen aggarsuliye,
we yala bela nuedibiye”,
oimagge, oimaggeyola.
¡Manidi arioemai, arioemai!
Ibdulagan agiginneyola.
¡Nunumagge ibdulagan agiginne!
6
BULAGWA
Bulagwa,
igi bula na e abgilagan idue,
igi bula burwasagla abin imagge,
igi bula na burba odimagge,
igi bula burwaba benegue.
¡Duiggwagwa, duddusuli!
¡Bulagwale!
¡Gwamaggagwale!
Ise inaba daggagwale.
Ina gwamaglegeyobi,
ina binyeyobi,
ina soblegeyobi,
ina ollile gueyobi,
ina burbagan na duimaggeyobi:
¡se gwamaggagwale
be nega seemalo!
¡Gwenaddigwale!
Ise argan gaagwale:
Sidsidi sogele,
anba gwenaddigwale.
Be sunmagged aggu iddogedile,
anba gwenaddigwale.
7
Be yobi daedisulile,
anba gwenaddigwale.
Yala baidsiggidile,
anba gwenaddigwale.
Yala urugan,
Yala nudaggemaladi,
gwenaddigwale arbamaladi;
Yalaga ablis daggemaladi,
bela gwenaddigwale.
¡Gwenaddigwale!
8
NANA BURGALA AGNUENAI
Nana uugassigi naigusa.
Nana uugassigi baggena dubiamagge naigusa,
bolo uurmaggenai, yabagilaggwaga.
Nana, uugassigi burgala agnuenai,
yabagilaggwaga burgala agnuenai:
“Bani muudule nig ileguoye,
bani mimiryo nua daggoediye,
na beba buglusaoye, girbalisaoye”
Nana, uugassigi burgala agnuenai,
bolobolo abalagi yabagilaggwaga agnuenai.
“Yoo, ani binagine gudesogeleye,
na beba buglusaoeye, girbalisaoye”,
yabaliggwaga burgala agnuenai.
¡Nana burgala agnuenai!
9
¡BABA, ANGA BE NUDSU SOBE!
Baba, anga be nudsu sobe,
inniggigwa, ise esgi siggale.
¡Wingwa, bega an amioe
e ibyaga!
Baba, anga be nudsu sobe,
yardormola yoi,
e nag sabdurgi magagwale.
An gassi uluba na ogwissega;
sedogusale na siagwagi oaega.
An nudsu anga sogoe:
ibiga be wile iddoge,
ibu be dobe,
igi nuga, waga an dubbu egisnaidi...
¡Baba, anga be nudsu sobe!
10
AN NANGA
Anbayoo ibmar an bidageunni,
anbayoo nagbid an wisgudageunni,
anbayoo dala an nolomagdageunni…
¡Nana!
¡An nanaye bad bese an godde!
An gwage, nagbid wisgusadgi,
an sana bonigan iddosadgi,
an bela wimagsaddigi:
¡Nana!
¡Nanaye anba bese an gorbali!
Be saburedgi adduagwale an gabissoggu,
be dunwegi an winnassoggu:
¡Nana!
¡Nanaye bese an gole!
Be walig, goe anba an iddoge,
goe anba iddolege
an geguardibe;
goe anba iddolege,
nagbid anse walamagsadibe:
Be anga burba daggedi,
¡Nana!
¡Nanaye, na bese gornasunna!
11
¡NELEGAN, NANA BURBA SELOGEDAGE!
¡Nelegan,
surbanegase ubogemegisa!
Nelegan,
sianalagwa yalabali,
waarsuidi yalaba,
bela biba waalewaale,
amuleamule,
dibaledibale.
¡Surbanegase, surbanegase!
Nega dulagwale,
nelegan inna odimaggali
we yalabina…
we yalabina, nelegan gwissiguali,
negaburba gannonagusa:
¡Gege we yala uglege,
gege mellege,
gege ielege,
gege beeye!,
nelegan gormaggenaigusa.
Nelegan, bela, amuleamule
ga gwilenaigusa;
bela sindiale sindiale
ga burba selogeye, selogeye,
nelegan sigu odimaggebuggwa.
¡Dibaledibale,
dulaledulale!
12
WAGGUDAR
Wagudar, bogdule golo onaggwiali:
an baba e agganse assade,
esa nugalase...
An nana, agbirnaigusa madun nogaga,
nega dulagwale:
¡We sunna sogedi!
¡Anmar dule wegi dae!
¡Wegi babagan nega aggwide!
¡Wegi muugan nega gannonagude!
¡An Yala!
13
NANAYE SE GOLLEGE
Dada naggwiali,
nega yolagude.
Muubilliganba
ulu yaggumagde:
we an Nabgwana.
We, anmar nana,
e molagan
muubilliba ibyenagusa:
¡we anmar nabba!
¡Nana nunis ibedi,
Nana dule aggwed wisidi,
E nugguse bela dule baddemai,
aase obunnolemai!
¡Nana sunnadi!
14
NOGA GOBE
¡Noga gobeyeeeeee!
An Yala gormagge,
an Yala namagge,
an Yala uurmagge,
an Yala golenai,
an Yala gwilegwissi,
gwilenai,
gwilemai:
¡noga gobe,
noga be gobeyeeeeee!
¡E, e, e, e, eeeeeeeee!
¡U, u, u, u, uuuuuuuuuu!
Nue gwilemalo,
nue siggirmaggemalo,
nue sindimaggemalo,
nue bibbirmaggemalo…
¡Wedi anmar gadi!
Anmar burba:
¡Noga gobe, noga gobe,
u, u, u, u, uuuuuuuu!
¡Noga be gobeyeeeeeee!
¡E, e, e, e, eeeeeeeee!
¡U, u, u, uuuuuuuu, u!
15
¿AN AI, GOLE AMINAMA?
Aggwa urba,
udurun urba,
ogob ugga urba.
Bissu soega,
uasiggwi soega,
dugu soega.
Gole aminama, ¿an ai?
16
¡IBDULAGAN URWEDIBI!
Sidsir yaagi be annaena,
bulu gingidurse be assaena,
assumigur e goe be ebugena,
suga yogasaar be gaena…
Bela ibdulagan,
bilogedimola yosabuggwa,
ibdulagan na sabed wisiddibi…
wisiddibi.
Masarnaibegi be annaena,
naligi be dodogena,
assu masmanai, be se assaena…
Bela ibdulagan na sabed wisiddibi…
wisiddibi.
Deginigwen…
dule na e nabbabina,
na nanbina
argan olomagsadibe,
na sigu gasa gwissigusdibe:
¡dule isgana,
bur gindagged nabiri!
wagmar gole buggwa,
wagmar uurmagge…
¿igi soge be iddomoga?
17
BABAGAN GWISSIGUSA
Babagan gwissigusa,
babagan gingiwalaga maddarmaali,
magebmola yosa maddarmaali,
wagar ginnosa, maddarmaali:
We Yalabina,
we Yalabina…
Nue ebinsao,
gi be gabdagbalo.
Yooedise, be abgilagi,
melle be odugguo,
ga be nuegwa sogo,
igi we Yala amilenaguali:
Muugan ibya odagsad,
muugan dadganbo magebmola yosadi...
We, ablis yala,
ablisgi ise obagwale nagude.
¡Gunayala, ablis Yala!
18
SIOR NAMAGGE
Goe gabeye, sior namagge;
sior waggudar namaggali…
Dada ibe naggwialidba,
bunadola gassigi agbanenaigusa.
Goe, be gabeye,
sior naa osiomagge;
goe bedi ua soediye,
bundor namagge.
Goe, be babadi masi digenadeye,
bunadola golenaigusa.
Dada ibe naggwialidba
sior gassigi agbanenaigusa.
19
ADDAGGE, NUE BE ADDAGGE
¡Addagge,
nue be emi addagge!
Siaigargi be namagge,
inna be nue gobe,
sabbur nue be aggwe,
bela yalamullugan,
be gwenadgan be dagge.
¡Addagge,
nue be emi addagge!
Melle be gabe,
Degir, be ibmar addursalego.
We Yala, be nana be dagge,
muubilligan be gadibi,
nue na be aggwe,
na be irwagwissigue
¡Addagge!
¡Addagge,
nue be emi addagge!
20
¡ DULE
BURSUNDE !
Bela ibdulagan na neg aggwebuggwa,
bela na neggi naggulebuggwa.
¡Dule bursunde,
dule bule,
dule bulesunna!
Aaga sabbiwalagn,
urwedimola yoi,
diwar iliba gwissigude;
aaga niisdulegan sigu oyode;
aaga an dadagan gabissuli.
¡Aaga, gwenadgan, gege anmar gabe!
21
YOOEDISE
Yooedise, be mimmi bese ibmar egisdago:
¿bia an muugan daniggi?
Melle ibmar gi odugguo,
ga sogsabinno:
¡Be muugan yala dummaganba daniggi,
neba dummagan ibedi,
nabba nuegan aggwidemaladi,
aa insega we nabba masamaladi!
Yooedise, be massi, bingedsuli,
bese goddago:
¿gusgu, we dubgana sibgan obega nai?
Melle ibmar be massigi be odugguo,
ga sogsabinno:
¡we dubgan, mani unale, na be idu ugsa,
aaga sibgan obedga binnide!
Yooedise, be bunolo,
binged iesa, bese ibmar egisdago,
¿baba, bia be sigude?
Melle ibmar gi be odugguo,
ga sogsabinno:
¡sigu dinnedi, an iesa,
Yala irwaguedi e burba, an iede!
Geb be mimmigan esa binigan ebudoe,
geb be mimmigan gwissigudagoe:
¡We Yala, ba gannaledoe!
22
NANA YALA
Sabbiwalagan, bela oginnode,
ginniddibi, ginniddibi…
Musggwawalagan,
ilawalagan,
saddewalagan,
igwawalagan…
urwedi mola yosabuggwa,
wagala bela alullugwale…
surgala oyode, surgala oyode.
¡Boni abin imaggega,
abinmaggega, abinmaggega!
Nana e abgilagan bela ulude,
ulude, ulude Nana irwa.
Nana Yalabina,
Nana Yalabina.
Mogirsailagan, biloedimola yoiddibi,
yoiddibi, yoiddibi.
Niisdulegan naggulede, naggulede,
bela ibyale ibyale.
Gabsus, mola gubyaledigi
Nana anwiali, Nana anwiali,
bela dumbiagwale, dumbiagwale:
Nana Yalabina,
Nana Yalabina.
23
WE AN YALA
We yala,
an yala,
nue an gadigwa,
an gad sunnadi.
An dadagan,
we yala amisadi,
gi daniggidi,
gi dulagusadi,
na e ablisgi bagsadi,
na e ablisgi ogsadi,
na e ablisgi enugsabalidi.
An muugan gi namagsadi,
bin ulusadi,
aa bina burgwenagude,
gi naibigusad yala.
An yala,
An Yala sunnadi:
¡Gege ibmar uglegedi!
¡Gege sabsur salegedi!
¡Ubsanagi anwagwale selegedi!
24
¡AN AI!
¿An ai, mango manama?
Yog ua soar,
yog sug gaar…
¿an ai, be ur nigga?
¡An ur dogdar bibbigwa!
¡Gwen baisur!
Gude anmar:
Gammi, gammi, gammi…
¡Yuuu, Yuuu, yuuuuuu!
25
DANIBALO
Wegii, babgan sunmagge,
wegii, nangan namagge:
¡Danibalo,
yooedise danibalo…!
Bela ibdulagan ba gannaledoe;
bela ibdulagan ba gwissigudoe:
¡Danibalo,
yooedise danibalo…!
Yooedise gannar danibalo.
gannar nega magedani dagledago,
gannar nega ibodani dagledago,
gannar nega ba ibegunai dagledago.
¡Massi Olowaibibbiler danibalo,
nue igarmai:
danibalo,
nue danibalo…!
Gwissi, bela abindagmalo.
¡Danibalo,
bar yogguosuli, nue daniggoe!
26
NADE, BAD NADE
Nade,
baddo nade.
Gi binsaed abelege,
gi sunmagleged abelege,
doddoganga, aagi be sunmaggo.
Nade,
baddo nade.
Dadgan dummad wilesa,
muugan sasiglenagusa...
Nasa inigwen, anba nunmagge,
yeer anba nunumagge:
gege bar bolegusa…
Be mimmi, nue we ibmar wisi, be odummoge:
melle sabsur we Yala imaggega, bina gwisguega,
gwissi argan olomagsa, negaseega…
Nade,
badnasa, gege bar anmar odoge.
Aaga, be doddo be odagge:
idu yawag eduega,
idu saggi obaddega.
Muugan bosadi, gege ielege,
anmar muigan, gege ielege.
¡Gwissigumalo,
aya dule, anmar gwissiguo,
27
ablis abalagi, argan olomaggar,
bela gwissiddibi, gwissiddibi…!
¡Melle sigmalo, boed badnasa!
¡Gabed sadde, idu yawag edimalo!
¡Ise ediar, ise ediar!
28
WE IGALA, DADGAN IGALA
Dii aggwanse gorsii,
mogir, dadase gornai,
ibnungan, guggurse golebuggwa,
isberwala, nabba duddugwase golegwissi,
diwala, balumaddase golemai…
Bela, na se gorbuggwa,
bela na gannobuggwa,
bela na se idagbuggwa,
bela na gi naggulebuggwa.
Aaga wegii Nana Olowainasob golenai,
Yarduagassigi nai, golenai:
bela an abgilagan
na argan oyoenai, oyoenaiye…
¡We igala, dadgangi daniggidi,
¡Melle be odugguo,
be mimmiganga be sogo!
29
BE SOGE…
Be soge,
be namagge,
be gormagge:
yarsig,
demarsig,
diwarsig.
¿Doase be goloe?
Na duggin besega,
na be duggin soge:
We an Yala, be soge,
We an Nana, be soge,
We an gadi, be soge...
¡Gannar gannar be soge we namagged,
be mimmi nongi siedise!
30
DADA NAGGWIALI
Dada muubilli ginnoedani,
muubilli duumaggedani,
muubilli magedani,
bela soole soole,
ibyale ibyale,
daggarmaggedani…
Melle, gassigi be edarbo,
melle, obsasuli be edarbo,
melle, wiedigi be edarbo.
Muugan wegii namagge,
dadagan wegii sunmagge:
dadasagla, esa gani, be abidaggo,
dadasagla, sigu gani, be abidaggo.
¡Weyob, na be mimmigan odurdaggo!
31
DADA MASSIDOLA
Massidola,
dilla gurgina siali.
Massidola,
wagala ginnoali.
Massidola,
swida oyoali,
bela dubaledubale.
Be dagge,
nue be dagge:
dobesuli naggwiali,
dobesuli ibyenaguali.
Massidola,
bela gunwale gunwale…
Dadibe naggwiali,
dadibe ibi dibyedani,
bela dulaledulale,
nega gannoedani, gannoedani.
¡Be gwisgue,
Massidola, bese golenai,
bese golenagusa…
¡Anbali bioye, anbali bioye!
32
MELLE BE SOGE…
Melle be soge:
An sursoggu, gwen baisur…
Melle be soge:
An nan sursoggu, gwen baisur…
Melle be soge:
An gwenad sursoggu, gwen baisur…
Melle be soge:
An dule sursoggu, gwen baisur…
Be ai bibyolenai be daggele,
be sarsolenaiyobi, na be iddoge.
Anba diggasuliddibe,
anba be gaya wissuliddibe,
anba aggu be daggeddibe…
Be dule mimmi,
be wargwenadsuli,
bela be ablis na yobbiragwadi.
We igala,
We igala.
33
IBDULAGAN
Bela ibdulagan:
aggwa,
burwa,
bula,
dimmurse baggar…
dule naimo.
Bela ibdulagan:
siggwi,
dior,
ammanoose baggar…
aggwabisgi naimo.
Ibdulagan,
ibdulagan, bela duladdibi…!
Nana abgilagan,
bela duladdibi duladdibi.
Nana abgilagan
na sunmaggeyola, na sunmaggeyola.
Na bendaggeyola,
bela burba addoagwale, addoagwale…
ibdulagan, ibdulagan.
Nana dulanai,
na e abgilaganga allenai;
e nunis nallesuli,
nallesuli.
34
Bela duladdibi, duladdibi.
Ibdulagan,
ibdulagan.
Muu dummadi,
wegi sunmagsa.
An sagla wegi namagge.
¡Ibdulagan, ibdulagan!
35
ABIAYALA
Abiayalagi,
anmar dadgan inse dagleali:
dadagan na aggwenoniggi,
Nanaye se gornoniggi,
na e wimaggedgi osanmagsa,
na e ablisgi ognagude.
Dulebaigan anba suli,
dulebaigan anba diggasuli...
anba sadde.
Anmar muugan,
ilemaggagwale bina anbagude.
Nisarmola yoiddibi, yoiddibi,
Nanga bibbirmagnai gudmala,
Nanga sindiale, sindiale…
burba dagdemala.
dulebaigan anba diggasuli…
anba sadde.
Dadagan, gwenadgan abingude,
aya embera, aya mapuche,
aya aimara, aya maya, aya tolteca…
na ibmar ogwabuggwa gudmala,
sindabilligan gannolede, gannolede...
Nanaga bulagwa mola yobuggwa,
nega seleali, seleaili…
36
dulebaigan anba diggasuli…
anba sadde.
Aya dule, we Nana, be Yala:
Abiayala, begadi,
melle be egise, be gadi,
melle be medde, be gadi,
melle be ollorsae, be gadi,
melle be ugge, be gadi,
be gadi, be Nana,
¡Nana sunnasogedi!
Geb dule baigan nonisunna,
e Nan sursoggu, obode;
e babomega unni imagnoniggi,
e Nansuli…
Aaga sabsur sasigge,
aaga basur maniga imagbuggwa,
basur ogwabuggwa…
¡Dulemardi, e Nana,
e Nana Yala!
¡Bela dulemar, anmar,
Nanbina gwisgumalo!
37

ibdula agiginne

Transcription

Similar documents

Qsida di Youssef Mabrouk alik ya ariss mabrouk